WTF

原本不打算加把口，因為不懂政事，但請問還有人當作政事，甚至正經事看待嗎？

這幾天的媒體報導，直把事情視作嘉年華，繽紛程度甚至遠遠拋離迪士尼開幕，報章頭條繼續嚇你唔死，「韓國爆發」尤其一絕，勸度果位仁兄仁姐轉去adv agency寫copy，前程會更無可限量；商台記者趙家強的報導也別開生面地以輕挑散漫的態度演繹，句句以“咁呢“開頭，簡直創廣播界之先；十七號晚警務署長李明逵的記招會，蛇果日報代表繼續其語不驚人誓不休本色：「請問這次的騷亂，唐英年是否有需要引咎辭職？是否引狼入室？」，我彷彿看見李署長頭頂有說話雲：「你知唔知自己o翕乜春呀？」

騷亂晚，適逢其會在看有線電視，不巧給我看到以下一段：
經過多次交手，雙方再次對峙，有線電視在場記者問身邊一位在看熱鬧的地中海阿叔市民：「警方已經多次呼籲市民立即離開，為何還留在這裡呢？」
答(語氣激動)：「家陣差佬有冇話戒嚴先？!」「係咪話戒嚴先？!」「冇丫嘛？!冇我就有權繼續留響道睇!」「做乜......？!聽下...佢地既訴求囉。」「總之呢，今次我覺得香港警察好專業，不過呢，呢個政府真係無能!」

人地問你一句，又唔係問你老母，駛唔駛咁激動？冇人話唔留得響道，但唔該你死你事，香港人就係咁，凡事愛襯墟，慌死蝕底，永遠要響自己個小世界做大爺，有權留低睇熱鬧，老虎都繼續睇，執輸行頭慘過敗家，今日小經歷，明日英雄事蹟，花點心思加鹽加醋的話直頭當打緊仗，生關死劫呀大佬!!
差人放催淚彈，又話冇事先通知，噴水又話噴到佢地，差人做野，永遠愛還句「差人大哂？」到出左事，又要賴差佬冇用，「冇事前通知」；係咪唔識聽廣東話？老早叫左你地走，逐個電話短訊email通知好冇？

行街搭車，大家當然七咀八舌講世貿，開口埋口都係「其實班農民好慘...」，好慘好慘，但其實大家又對事情了解幾多？只不過每日蜻蜓點水式地快覽幾則報章頭條就覺得自己了解世情，四捨五入，知左當識。公平、human rights，講到尾，想似返個人，活得有尊嚴；要講慘，我覺得香港警察都好慘，周末OT，仲要俾自己人柴台(阿彌陀佛，連陳主教都要踩一腳)；講慘，內地煤礦工人命更賤，活得更無尊嚴，支持韓農班仁兄仁姐，又有冇為佢地呼冤抱不平？大家都只不過係適逢其會，揀個就手又便利既機會，自己做自己心目中果幾分鐘英雄。

如此愚「民」，如何當家作「主」？